ياسمين غيث.. منذ إصابة الفنانة ياسمين غيث بسرطان الثدي عام 2016، سعت لـ تسليط الضوء على أهمية الكشف المبكر للمرض الخبيث، وخلال لقائها ببرنامج ست الستات تحدثت عن حياتها مع جدها وعلاقتها به وتطرقت أيضاً في حديثها عن مرضها.

علاقة ياسمين غيث بـ جدها

ظهرت الفنانة ياسمين غيث ضيفة على برنامج ست ستات عبر قناة dmc، حيث روت للإعلامية سناء منصور تفاصيل علاقتها بجدها الراحل عبد الله غيث، وإبراز الأثر الكبير الذي تركه الجد عبد الله غيث وعمه حمدي غيث في حياتها.

ووصفت تلك السنوات الأولى بأنها كانت مليئة بالحب والاحتواء، قالت: «جدي عبد الله وعمي حمدي كانوا الحضن الدافي اللي عشت فيه طفولتي. كنا بنستنى الصيف بفارغ الصبر علشان نروح العزبة في الشرقية، ونجتمع في بيت جدو عبد الله.. ده كان البيت اللي فيه كل حاجة حلوة».

وتابعت: «هو مات وأنا صغيرة، بس مش ممكن أنسى روحه الطيبة، وكرمه وحنانه اللي كان يغمُرنا لما نقعد معاه. كان وجوده بيدّي إحساس بالأمان.. كنت بحس إنه مش بس جد، ده حضن كبير بيحتوينا كلنا.».

وبعد فقدانها الجد عبد الله، أضافت: «جدو حمدي هو اللي فضِل في حياتي بعد جدو عبد الله، وكان نسخة منه في الحنية. فاكرة إنه كان دايمًا يقشرلي البرتقال بنفسه، ويقعد يحكي لي حكايات من زمان.. كان بيحبني بصدق، وكنت بحس بنفس طيبة جدو عبد الله فيه».

وأشارت ياسمين غيث إلى أن والدها يمثل الامتداد الحقيقي للصفات الجميلة التي تمتع بها عبد الله غيث، موضحة: «بابا واخد منه حاجات كتير، من أول الهدوء، للاحترام، لطريقة الكلام، وحتى الوقار. بحس إن جدو سايب وراه نسخة في بابا.. نفس الطيبة، نفس الرجولة، ونفس الهيبة اللي كانت في عبد الله غيث».

واستكملت حديثها:«هو ماكنش بس فنان، هو كان راجل جدع وطيب وأصيل.. كل الناس اللي عرفته حسته كده، مش بس العيلة. الناس كانت بتحبه مش لأنه نجم، لكن لأنه إنسان عظيم بمعنى الكلمة».

إصابة ياسمين غيث بسرطان الثدي

وانتقلت ياسمين غيث خلال اللقاء للحديث عن واحدة من أصعب التجارب التي مرت بها وهي رحلتها مع السرطان، حيث قالت: «حسيت بحاجة غريبة في جسمي.. كأن الزمن وقف. قلبي قالّي من اللحظة الأولى: ده سرطان. ماستنيتش، رحت لطبيبة نساء، طلبت مني تحاليل وأشعة، وبدأت تهيئني نفسيًا للخبر. بس أنا كنت حاسة من الأول».

وأضافت: «بعد التأكد، دخلت في حالة انهيار تام. كان عام 2016، وكلمة سرطان وقتها كانت مرعبة. حسيت إن حياتي انتهت، وإن ابني مش هشوفه بيكبر.. كنت صغيرة، وهو كمان طفل».

وتابعت: «صليت وقلت لربنا نفسي أعيش.. مش علشاني، علشان ابني وأسرتي. بعد ما تأكدت من نتيجة التحاليل، دخلت العمليات بعد ساعة واحدة.. وكل حاجة حصلت بسرعة غير متوقعة. كانت أسرع لحظة في حياتي».

وأكملت:« السرطان تجربة قاسية، بس اللي بيعدي منها بيتغيّر للأفضل.. بيتولد من جديد.ربنا يكتب الشفاء لكل مريض، خصوصًا اللي لسه في أول حياته، ولسه خايف أو تايه ».

اقرأ أيضاًزوج ياسمين غيث يكشف عن حالتها الصحية بعد جراحة استئصال الورم

بعد عملية جراحية لـ إزالة ورم سرطاني.. تطورات الحالة الصحية لـ ياسمين غيث

عملية جراحية وورم.. ياسمين غيث خائفة للغاية (اعرف السبب)